政情：鄉局上樑林偉強相沖迴避？
鄉議局沙田石門新大樓尋日舉行上樑典禮，主席劉皇發及副主席張學明帶領一眾鄉紳及嘉賓出席見證，新大樓明年初落成啟用。新大樓條樑就上得夠晒正嘞，但「下樑」似乎唔係好正，事關上樑咁大件事，副主席林偉強（We Wet強）竟然唔見影。
尋日有過百名嘉賓出席上樑典禮，由於新大樓地盤未有冷氣，似足焗桑拿，戴埋安全帽就連頭頂都出汗，要招呼賓客嘅發叔就更加辛苦，好彩仲有學明及一班鄉紳幫手。
發叔：肖牛沖吉日
問We Wet強去咗邊，發叔好無奈話：「佢去咗服侍班離島區議員去遊上海世博嘛，嗰度（離島區議會）多票吖嘛，我哋鄉議局和諧就話唔會踢佢走啫！」嘩！聽完呢番話就知發叔有幾嬲。不過，發叔啖氣過咗之後就補飛話，We Wet強個生肖同尋日上樑個良辰吉日相沖，所以要迴避典禮喎！
翻查資料，We Wet強係一九四九年出生屬牛，我哋問過堪輿學家麥玲玲，佢話尋日係定日，宜上樑和修灶，而相沖嘅生肖只有屬蛇，同屬牛完全無相沖。要迴避啲乜，得佢自己至知嘞。