政情：公民黨搞「公投」一Q清袋
公民黨為咗夥拍社民連策動「五區補選，變相公投」，豪擲超過一百萬元，資助落場上陣嘅黨員陳淑莊同梁家傑，表面風光，原來打腫塊面充闊佬，嗰一百萬元原本係預留打明年區議會選戰嘅「儲糧」，依家糧草燒光，想再揼支持者心口又出師無名，籌款無力，陷入財困半天吊窘境。公民黨經歷「公投」一役，流失唔少中產選票，現更牽連明年區選選情，真係賠了夫人又折兵囉。
政黨打選戰，等如燒銀紙。公民黨為五區補選洗濕個頭，焗住空心老倌充炮艇，無閒錢打選戰，就喺明年區選經費中，抽調咗一百萬元參選，其中八成即八十萬元，分配畀知名度低、吸金力弱嘅陳淑莊，另加十五萬元物資贊助，體現政治貴族洗腳唔抹腳嘅公子哥兒本色。
不過，使錢容易搵錢難，公民黨補選夢醒後，頭痛欲裂，有核心成員透露，使咗嘅一百萬元，本來預留做明年區選開支，依家區選工程迫在眉睫，三軍未動，糧草先行，去邊度搵番一百萬元嚟填氹？
參選超級區會 進退維谷
事實上，自五區補選一役後，公民黨號召力已大不如前，有唔少中產同專業嘅傳統支持者紛紛求去，呢班人係公民黨嘅「水喉」，現時財源支柱動搖，揼人心口籌錢更加難上加難。今年三月底，即公民黨宣布夥拍社民連搞五區補選後，公民黨搞大型電影籌款，捐款數字直線下滑，跌到得番二十萬元，比○九年嘅一百三十萬元急跌八成，就係最佳例子啦。
根據選舉法，立法會選舉候選人取得百分之五或以上選票，每張選票獲津貼十一元，最高唔超過選舉總開支一半。以陳淑莊得票十萬零三千幾票計，陳可獲發回七十萬元，呢筆數在情在理都應該歸還公民黨，可惜，政府官僚機器運作需時，筆錢唔知幾時到手，遠水不能救近火，公民黨玩公投玩出火，分分鐘牽連明年區議會選舉，可謂偷雞唔到蝕揸米。
仲有，「公投」過後，公民黨唔止財政半天吊，選舉策略亦搞到半天吊，進退維谷。好似參加一二年超級區議會議席咁，公民黨想落場競逐，但當日一齊策動五區補選嘅搭檔社民連高調宣布杯葛超級區議會，佔盡道德高地，公民黨難免被比下去，姿態難睇，所以，聽講公民黨高層好希望社民連能回心轉意，陪佢哋一齊選超級區議會。唉，明知結果，何必當初，公民黨唔知有冇後悔走上「公投」之路呢？