中環耳目：葉劉母女龍景軒歎和牛面肉
立法會議員葉劉淑儀愛女葉榮欣由美國返港放暑假，早前兩母女去中環四季酒店嘅龍景軒撐枱腳，呢度嘅香焗薑葱芝麻雞同古法生煸澳洲和牛面肉製作特別精緻。
入口似牛腩
龍景軒係米芝蓮三星級著名食府，早前一個星期六晚，葉劉同千金慕名而來，此行仲有另一目的，就係探老友嘞。原來葉劉嘅facebook粉絲Bernard Chan月前由半島酒店嘅瑞士餐廳跳槽去咗龍景軒做品酒師，葉劉一於嚟打氣，Bernard為葉劉預備一支甘香清甜嘅白酒，又精選幾味巧手菜式，包括甜豉醬焗智利鱸魚柳、豉椒龍蝦球等，鱸魚柳焗得香脆，配上甜豉醬，吊出鮮魚香味，葉劉愛keep fit，食魚最啱佢。
再來一味澳洲和牛面肉，澳洲和牛係以日本傳統養牛方法引入澳洲，喺當地牧場飼養日本牛種，油花分布絕不遜於日本和牛。龍景軒以古法炮製和牛面肉，牛面肉入口似牛腩，不過肌理要比牛腩幼細嫩滑。
