中環出更：孫秉樞戴機械錶撐囝囝
鐘錶業老行尊孫秉樞，平時經常戴住自己代理嘅星辰錶（CITIZEN）做宣傳，但佢早前出席一個鐘錶活動時，竟然戴住一隻機械錶，牌子就係由德國設計、瑞士製造嘅Ingersoll、Hour Tourbillon型號，設計簡約，配上皮錶帶更覺優雅，雖然價錢只係過萬元，但大中華區只限量銷售一百隻，非常矜貴。孫秉樞話，呢個牌子係佢囝囝做代理嘅，梗係要支持吓啦！
傳統機械錶與時下流行嘅潮款電子錶各有市場，孫秉樞就腕錶潮流有一套見解，佢話好多人覺得機械錶可以last forever（一生一世），但原來唔一定嘅，因為萬一壞咗搵唔到零件修理，就要同隻錶講bye bye。至於石英錶，佢話如果避免電路板受潮，一樣好耐用，佢仲賣花讚花香話，將光能變換為電能嘅「光動能」環保技術更加好，唔使特別打理，相當方便。
