中環出更：鄧永鏘豪擲萬元掃歷史書

David曾講過，香港太多無知、無學識嘅人，David私底下的確好勤力刨書。星期一晏晝四點，西裝骨骨嘅佢拖埋性感打扮嘅外籍太太逛太子大廈嘅藝廊「PICTURE THIS」睇書。呢間舖頭售賣嘅書籍，全部係經典珍藏，坊間難求。

喺書海前，David雙眼不停掃射心水書籍，睇見最愛嘅歷史書，兩眼即時放光，三扒兩撥掃入幾本講述中國歷史、英國歷史及中國猶太人嘅英文書，每本書有成寸幾厚，David攞唔晒，於是將揀啱嘅書先放喺收銀處。店員對呢位貴客照顧周到，雖然冇貼身跟住揀書，但只要David一揚手，店員就醒目地伸出雙手將書接住。

揀完書，David意猶未盡。店內同時出售多幅攝影名作，每幅大到足以掛喺大廳牆壁，David左睇右睇，對邱良作品非常着迷，邱大師擅長透過鏡頭捕捉香港風貌，其中兩幅展示上世紀六、七十年代香江風貌嘅作品別具韻味，David愈睇愈鍾意，一於扑錘買走，捧住兩張相行去收銀處碌卡畀錢。

「PICTURE THIS」藝廊專營古董書籍、海報及攝影名作，充滿藝術色彩。	David（右）左手遞書畀店員（左），右手又急不及待揀另一本書。	多幅大師作品花多眼亂，David細心地「尋寶」。

睇中邱良攝影作品

行出門口之際，卓妮上前打招呼，David露出滿載而歸嘅笑容話：「買咗七本書咁多，部分用嚟睇，部分會收藏起嚟」，果然係書癡。David又自爆生活寫意，啱啱同太太把臂同遊法國歎世界喎。

卓妮