政情：葉劉重遊飛鵝山舊居
由匯賢智庫立法會議員葉劉淑儀夫家家族持有嘅飛鵝山道大宅近日推出標售，曾經喺大宅住咗十八年嘅葉劉前日特登舊地重遊，影相留念。葉劉話呢座大宅空氣好、風水好，佢囡囡葉榮欣都住得非常開心。
葉劉尋日喺facebook刊登咗佢重遊舊居嘅相，仲留言話佢八一年開始住喺大宅，一住就住到九九年，雖然當時有蛇蟲鼠蟻、制水與水浸、竊匪與偷渡客、山泥傾瀉與山火等，但嗰度係佢十幾年嚟照顧丈夫同養育女兒嘅地方，所以意義重大。呢度間屋一萬呎，花園五萬呎，當年就只得佢哋幾個人住。
葉劉仲同我哋講，大宅嗰度人煙少、空氣同風水都好，連孫中山嘅媽媽都喺飛鵝山有個衣冠墓，平時佢久唔久都會返大宅行下。葉劉入住大宅嘅時候做緊首席助理政務司，離開嘅時候已經升至保安局局長，風水有幾好可想而知。大宅喺下個月十六日就截標，市場人士估呢個項目值四億元，果然係風生水起嘅好地方。