政情：CY推銷城大似賣樓

CY話，城大係香港八大院校中，唯一一間鄰近港鐵站和商場，所以住喺城大宿舍嘅外地生，不但享用到香港出名嘅公共交通工具，往來商場亦都成為城大生生活嘅一部分。

佢仲舉咗個例話，城大生花費喺衣着嘅錢可能唔多，但係城大生着衫着得幾好睇，相信都係同校園鄰近商場之故，仲希望兩岸四地嘅學生享用到城大校內以及商場嘅設施。城大學生聽到佢咁推介自己間學校，唔知會唔會拉大隊去請願，要佢講番啲正常啲嘅說話，唔好失禮間大學呢？