政情：林健鋒巴西扮窮自保
經濟動力立法會議員林健鋒（Jeffrey）上月去咗南美巴西考察十日，尋找商機之餘，仲到各處名勝遊覽。佢先後到訪聖保羅保利斯（PAULISTA）金融大街、里約熱內盧Copacabana海灘、Corcovado山嘅巨型耶穌像，俯瞰里約熱內盧全景，美不勝收。不過，巴西治安唔好乃街知巷聞，所以Jeffrey唔敢掉以輕心，出外遊覽唔敢戴名錶及攜帶名貴財物喺身。
唔敢帶「勞」出街
Jeffrey話，巴西貧富懸殊好嚴重，雖然治安未至於強搶財物嘅地步，但人生路不熟，出入都要小心為上，唔好戴貴重嘢喺身，避免珠光寶氣令賊人覬覦，所以佢去好多地方都係着恤衫或T恤，兼且着鞋唔着襪，連平時戴開嘅勞力士腕錶都唔敢戴出街。不過，Jeffrey話酒店及旅遊景點都有保安及警察駐守，安全問題不大。
除咗有錶唔敢戴，Jeffrey同朋友去餐廳品嘗巴西燒烤發生咗件趣事，大家入餐廳坐咗好耐，都無侍應騷佢哋，經詢問後才找出箇中因由。原來每人枱頭都有一張薄卡紙，一邊紅色，一邊綠色，紅色代表「No thanks！」即係暫時毋須服務，咁啱大家張卡都係紅色向上，所以侍應唔敢上前打擾囉！
下屆世界盃將會喺巴西舉行，Jeffrey預期當地未來消費一定好好，屆時將會生產好多紀念品及禮品，造玩具嘅佢有機會分一杯羹都未定喎！