中環出更：鄉局籌款夜名人晒靚錶
新界鄉議局沙田石門新大樓今日舉行上樑典禮，意味新大樓快將落成啟用，而局方就繼續為一億五千多萬元建造費埋尾，前晚喺九龍灣展貿舉行電影《諜海風雲》籌款首映禮及晚宴，名人買枱踴躍，晚宴共籌得三百萬元。當晚好多嘉賓都悉心打扮，兼且名錶盡出，好似擁有六千幾萬豪宅嘅運輸及房屋局局長鄭汝樺（Eva），戴咗隻Bedat & Co嘅No.3鑽石錶。
合和實業董事總經理胡文新（Thomas）有份支持首映禮，佢前晚戴咗隻價值五萬多元嘅意大利Panerai Luminor Marina腕錶，隻錶擁有44mm超大錶殼外徑，Thomas戴咗更覺豪邁。作為主人家之一嘅鄉議局副主席林偉強都唔輸蝕，出動早前喺巴塞爾鐘錶展購買嘅Citizen Eco-Drive光動能全球電波時計，呢款錶全球限量二百五十隻，價值二萬港元。
Eva鄭愛煲碟減壓
講番當晚參加首映禮嘅嘉賓，原來好多人都鍾意睇戲，其中Eva就好鍾意喺屋企煲碟減壓，佢話中西電影都啱，只要係笑片就得嘞，卓妮問佢邊套笑片最鍾意，佢話睇過咁多齣戲好難話特別鍾意邊一套，如果真係要揀一套鍾意嘅，就揀套近廿年前嘅勵志電影《Chariots of Fire》（烈火戰車）。齣戲係講兩個青年短跑選手為參加奧運嘅奮鬥故事。
鄉議局主席劉皇發感謝各界慷慨捐助，副主席張學明就話，新大樓建造費已經籌得七七八八，今日舉行上樑儀式後，預料明年初落成啟用。
