政情：司馬文「笑談」廣東話
因為陳岳鵬做咗特首辦特別助理而懸空嘅南區區議員空缺，聽日截止報名，除咗匯賢智庫派出牛津尖子劉應東（Ellis）出戰，尋日公民黨嘅「老香港」司馬文都報名參選，同Ellis拗手瓜。公民黨尋日幫司馬文造勢，除咗搵嚟司馬文兩個囝囝撐場，公民黨五個立法會議員同核心成員都有現身。
喺荷蘭出世嘅司馬文，已經係兩仔一女嘅爸爸，囡囡啱啱出世，人生有一半喺香港過。佢話喺香港居住多年，對呢個地方有感情，熟悉地區事務，有信心可以鍊贏Ellis。不過，司馬文自爆廣東話麻麻，尋日佢九成時間講英文，咬字最正嘅廣東話係「大家好，我係司馬文」，但講到話自己係香港地膽，喺香港留低好多腳毛之類嘅輕鬆說話，大部分都聽唔明佢噏乜。
何解？原來喺香港居住咗廿六年嘅佢，無真正的起心肝學廣東話。佢自嘲發音太差，聽佢講廣東話嘅人都會係咁笑佢，搞到佢表達唔到自己意思，索性講番英文喎。不過想做區議員，唔同香港人「同聲同氣」好難㗎喎！司馬文都明白呢個道理，承諾以後苦練多啲喎。