副局政助嘅中期檢討至今只聞樓梯響，自由黨索性自己做民調，結果七成幾被訪者話應該減薪。自由黨常委田北辰尋日勞氣話，以副局長十幾廿萬月薪，喺私人市場已係總監級，應該一上到戰場就交到功課，無可能埋咗位至熱身。
不過佢嘅黨友楊孝華位公子楊哲安Jeremy，正正喺教育局做政助。問二少點睇Jeremy？佢話教育局仲記得佢嘅存在，Jeremy同教育局副局陳維安都有搵佢傾吓教育問題，但兩人同上司嘅溝通就不得而知啦！
