政情：行會起錨成員齊變輸家

夏佳理跌得最甘

政府要政改「起錨」，身為煲呔曾內閣嘅一班行會成員，人人心中掛個「勇」字做推銷爛頭蟀，其中夏佳理、胡紅玉、梁智鴻同張炳良，粉墨登場幫手拍宣傳短片，效果最搶鏡。其中一輯短片，夏佳理喺短片中有呢句壓軸對白：「為民主，你我一齊贏，起錨啦！」點知夏佳理自己同其他幾個「起錨」行會同僚，就已經變咗輸家啦。

港大民意研究計劃喺七月進行行會成員的認知排名調查，發現對比三個月前，「五大」名單起咗大變化。從熟悉程度計，頭三位依次係梁振英、夏佳理同張炳良，上次排第四、第五嘅劉江華同劉皇發，跌出認知度門檻，被首次上榜嘅梁智鴻同胡紅玉取代。睇到呢度，「起錨成員」好似受惠起錨騷，但再睇埋落去，原來係另一回事。

調查同時顯示，喺市民評分方面，夏佳理、梁智鴻、梁振英、胡紅玉同鄭耀棠係評分最高嘅五名行會成員，但除梁智鴻同胡紅玉外，其餘三人得分全數顯著下跌，喺四十分至五十分之間浮沉。當中尤以夏佳理嘅評分跌幅最大，雖然佢喺民望評分保住榜首位置，但得分比起上一次四月嘅調查急跌六點三分，低至四十八點八分「肥佬」水平，係佢○六年首次上榜以嚟嘅新低，認真大犧牲！

曾經喺起錨宣傳片引用「柴九」名句、反問若政制發展再原地踏步，香港仲有幾多個十年嘅教育學院校長張炳良，民望評分跌得無咁甘，但都下挫四分，鄭耀棠同梁振英亦分別下跌三點四分同兩點六分，民望齊齊「拋錨」。

梁智鴻同胡紅玉由於新打入知名度「五大」，民望評分無得比較，但今次得分亦唔係高，梁智鴻攞四十七點二分，僅次於夏佳理。胡紅玉攞四十二點一分，僅僅高過攞四十一點八嘅鄭耀棠。即係話，有份演出起錨騷嘅行會成員，民望評分反而下跌。