中環出更：陳智思愛食包鬧市照啃
港人飲食口味一向西化，唔少中環白領一族都將麵包當飯食。曾留學美國加州嘅亞洲金融集團總裁陳智思（Bernard）都愛上啃麵包，愛包程度，已到達「每日一包」地步。上周六，Bernard帶囝囝行街街，喺香噴噴嘅麵包誘惑下，當街大快朵頤，率性得很！
官仔骨骨嘅Bernard，平日好少喺街上展露食相。上周六家庭日，佢趁下晝空檔湊吓仔，拉埋十歲大仔銘謙及七歲細仔銘宇行ifc，行街享受家庭樂。穿上Nike運動衫嘅Bernard戴上黑超，自備購物袋逛街，一派住家男人風範。
時近下晝四點半，正是下午茶時間，超市citysuper內嘅麵包店Little Mermaid Bakery啱啱端上幾盤熱烘烘麵包，牛油香氣撲鼻，Bernard一個箭步走入店內，夾起一個新鮮出爐嘅甜餐包畀錢，十足大細路，佢示意兩位公子一齊買包食，可惜小朋友唔愛啃包，惟有「獨食」。
出爐麵包暖在心頭，Bernard忍唔住拆開紙袋，即場咬番幾啖，佢食得好有儀態，用麵包紙袋遮住張嘴，免得麵包碎周圍飛，唔使五分鐘就食晒個包，嘴角露出回味笑容。
最鍾意港式甜餐包
卓妮上前say hi，Bernard直認專程嚟買包食。原來Bernard係超級麵包迷，每日唔食麵包就囉囉攣。呢日佢本來帶囝囝去ifc會合太太，齊齊去銅鑼灣食飯，點知「麵包癮」起，開飯前都係要整番個包食。Bernard又話，佢公司喺環球大廈，離ifc嘅麵包店只需幾分鐘路程，下晝唔得閒外出食晏，就叫人買包畀佢食。咁多款包，邊款至係心水？Bernard就話：「梗係港式甜餐包！」
麵包店喺香港開至成行成市，來自日本嘅Little Mermaid Bakery麵包，每日新鮮烘焙，部分麵包寫明無糖及油分，啱晒注重健康嘅人。
卓妮