中環耳目：白富鴻生意會務兩頭忙

卓妮上星期六去尖沙咀行街，撞到白富鴻去巡舖，見佢一入到舖就攞啲燕窩乾貨出嚟聞吓又睇吓，又同前線員工傾偈，無留意到卓妮企咗喺隔籬。白富鴻話七月起接任菁英會主席，珠玉在前做得咁好，佢當然無得偷懶，但燕之家又係自己一手創立嘅品牌，所以魚與熊掌都要兼顧。

舊年菁英會搞博鰲青年論壇有聲有色，今年再接再厲繼續成為菁英會重頭項目，討論金融海嘯之後嘅亞洲面貌，到時有唔少猛人來港出席。此外，八、九十後對香港影響愈來愈大，佢哋都有意吸納呢股新勢力，準備與全國青聯聯手搞活動，與中港年輕一代齊齊探討核心價值。

白富鴻喺舖頭好內行咁攞起燕窩嚟聞。

白富鴻每日都有食燕窩，生意同菁英會會務都可以兼顧。

菁英會擬派員選區會

菁英會現時有十二個研究會，涵蓋唔同範疇，佢希望藉此推動多啲社會活動，等會員多啲喺中國同香港參政議政，唔排除派員參加嚟緊嘅區議會選舉。佢仲預告遲啲會搞啲輕鬆活動，好似針對中學及大學生推出嘅新青年工作計劃，座談會之外，又會搞導向營及康樂活動，大家打吓波、唱吓歌聯誼吓，仲會安排年輕人與企業互訪交流。

要將生意同會務都做好，白富鴻話必須見招拆招，邊樣急就做邊樣先，生意上有好同事，菁英會有好兄弟幫手，佢有信心做得好！