政情：議員評分 潘潔包尾
政府快將公布副局長同政治助理嘅中期表現評核，傳媒紛紛自行率先搵立法會議員對呢班政治新丁打分，結果慘不忍睹。港台尋日公布同類調查，以十分滿分，五分為合格，結果副局同政助，各有一人合格，其他全部「肥佬」；包尾者，分別係被公民黨余若薇批評態度差嘅環境局副局長潘潔同甚少喺立法會露面嘅發展局政助張文韜，二人嘅評分都係三分都唔夠。
港台嘅問卷調查，收番廿二份議員回應，副局長中以食物及衞生局副局長梁卓偉得分最高，但都只係得六點五分。政助方面，以勞工及福利局政助莫宜端居首，但更低於五點二分，即最高分嘅政助，都係僅僅合格，納稅人啲錢真係使得唔抵。調查顯示，十九個副局政助中，十四人被過半數受訪議員要求減薪，只有梁卓偉一人獲建議加人工。
副局人工介乎十九萬至二十一萬元，政助由十二萬至十五萬元不等，以班新丁嘅表現，減佢哋三成人工，都畀高咗啦。