政情：發叔Ann蔣組團豪遊東歐
正值盛暑嘅香港日日熱到暈，好多人選擇外遊避暑，暫時逃離呢座石屎森林。鄉議局主席劉皇發原來同全國政協蔣麗芸（Ann）好老友，佢哋幾乎年年都舉家把臂外遊，下星期佢哋又組咗個豪華旅行團，去東歐豪玩兩星期，未計機票每人旅費已經要三、四萬蚊。
阿Ann同發叔咁熟落，原來緣於大家一齊做全國政協委員十幾年，大家差唔多年年都會號召兩家人組團去旅行。今年嘅團友陣容龐大，包括身為發叔女婿嘅信和集團總經理余漢坤夫婦、新田鄉事委員會主席文富穩夫婦、Ann嘅老公梁海明同埋父親蔣震都會同行。阿Ann話，廿幾位團員之中，唔止有香港人，仲有台灣人、內地人同外國人添！
佢哋搵旅行社設計咗個老少咸宜嘅行程，包括去捷克最迷人嘅布拉格，跟住上郵輪暢遊多瑙河，途經奧地利、匈牙利嘅布達佩斯等。阿Ann話，佢最期待去布拉格古城探秘，見識世界著名作家卡夫卡嘅舊居。