政情：自由黨冬瓜盅宴賀授勳
自由黨成班高層同十幾位黨友，尋晚喺富臨飯店設宴，實行羅漢請觀音，慶祝三位今年獲頒銅紫荊星章及做咗太平紳士嘅黨友。難得咁高興，遲到嘅自由黨副主席張宇人十分識做，萬歲咗四支紅酒同黨友暢飲。雖然佢哋張菜單上無富臨最出名嘅「阿一鮑魚」，但就有十分合時嘅冬瓜盅，近排天氣酷熱，食冬瓜盅最啱喇。
志在聚餐 無鮑參翅肚
自由黨尋晚七點半喺富臨筵開兩席，人唔算多，但勝在夠親密。獲頒銅紫荊星章嘅上任東華三院主席李三元，同中西區區議員李應生心情勁靚，笑到見牙唔見眼，李三元話無禮物唔緊要，有心就得㗎啦！至於獲委任做太平紳士嘅陳遠華就一早到場，仲同黨主席劉健儀、常委田北辰、李應生及李三元影番張合照。
難得去富臨，梗係要食鮑魚啦。錯喇！我哋
到菜單，一味鮑參翅肚都無，較為近磅嘅只係花蚧肉翅群冬瓜盅同燒雲腿油泡肚尖。原來尋晚張菜單係自由黨發辦，講明唔要鮑參翅肚，但點咗佢哋食開嘅富臨脆皮雞同燒汁焗牛尾，埋單大約一萬蚊左右，即係五百蚊位。其實佢哋都係志在聚餐，食得豪唔豪唔重要。