政情：卿姐火滾鞭撻大懶蛇

○八年秋，前綫同民主黨合併，一向重視紀律嘅卿姐，一入民主黨就擔當當年「華叔」司徒華嘅黨鞭角色，嚴打黨內各級議員、中常委同地區支部委員開會遲到早退，甚至無故缺席，令長期紀律不嚴嘅白鴿黨人人自危，個個話改。豈料兩年唔到，故態復萌，而且懶蛇新招層出不窮。

卿姐尋日同傳媒聚會時頗勞氣話，民主黨想提高黨效能，先要執靚考勤，平日黨員參加活動，好似示威遊行或者黨友相約碰頭傾談，成日有人遲到早退，甚至缺席，要花人力物力三催四請。

卿姐更踢爆，有人代表民主黨參加星期五泛民飯盒會，一係遲到，一係無到，一係應承將會上問題帶回去諮詢黨友，最後竟然無咗件事。卿姐話，唔想開名逐個數邊個黨友違紀違規，叫傳媒自己打聽，肯定俯拾皆是。卿姐告誡黨員：「唔該唔好再周圍Hea嘞！」

張文幫老婆搬屋甩底

民主黨立法會議員張文光向我哋坦白招供，佢係卿姐口中嘅違紀黨員之一。上星期張文同卿姐約咗鄉議局成員開會，點知當日張文屋企搬屋，佢話：「老婆叫到，唔搬想死咩？」於是甩卿姐底，事後被卿姐省咗三次。張文形容，卿姐呢位黨鞭好上心；聽語氣，卿姐揮鞭已喺佢心中留下深刻烙印，唔敢再違紀。

不過，另一位民主黨立法會議員涂謹申就對卿姐嘅教訓有微言。阿涂話，有時有啲會黨員出席率唔高，唔係黨內普遍情況，指卿姐只係分擔部分黨務，睇嘅並非事實全部。佢又反駁指，黨政要平衡，好似若然星期四大學有論壇，議員可藉此接觸大學生，唔通寧願放棄出席而參加黨團會議咩？認真係各有各嘅理由，睇嚟卿姐要做好黨鞭個位，都唔係咁易！

另外，有「李漢奸」稱號嘅民主黨創黨主席李柱銘早前因不滿民主黨支持政改方案而揚言會退黨，但考慮咗個幾月，仲未考慮完，唔知要扭擰到幾時。卿姐尋日話，相信佢最終都係唔退黨居多。