中環出更：黃子欣馮國綸跑出友情
偉易達主席黃子欣（Allan）同利豐集團董事總經理馮國綸（William）好老友，佢哋互為對方公司出任獨立非執行董事多年，兄弟之情毋須多講。點解兩人咁投契？Allan笑稱大家係「跑友」，一齊跑渣打馬拉松十幾年，賽前仲會約埋集訓添！
日前偉易達召開股東周年大會，通常上市公司嘅獨立非執董都唔會出席呢啲例會，但William幾忙都抽空現身，同Allan早排以獨立非執董身份現身利豐股東會一樣咁有心。Allan話，佢哋兩人好鍾意跑步，又動員集團員工跑馬拉松。今年利豐有一千五百人落場跑渣打馬拉松，偉易達就有八百人，兩間公司仲分別獲得「最鼎力支持大獎」第三、四名。
Allan間Vtech係全球最大固網電話供應商，今年佢更首次躋身《福布斯》本港「四十大富豪榜」第三十二位，同一向榜上有名嘅利豐馮氏兄弟更加拉近距離。兩兄弟志趣相投，事業又咁成功，難怪愈嚟愈啱傾！
卓妮