中環出更：陳健波狼吞鵝肝搵命博
潮州人「家己冷」詹培忠（金勞詹）同陳鑑林（橄欖）發起嘅潮汕美食之旅，話咁快就玩完返嚟。四個立法會「潮人」連同九個議員及家屬共三十幾人，受潮汕四地市政府設宴款待外，仲歎盡潮汕地道特色美食，餐餐食到攬住肚，好似保險界陳健波搵命博勁擦大大件滷水鵝肝；工聯會王國興就畀潮州粥吸引，一次過食四大碗，之後餐餐都話要食粥。
彈牙牛丸 個個添食
潮汕美食之旅喺上周五出發，玩到前晚（本周日）返港。玩足三日兩夜，參加者除咗金勞詹、橄欖、健波、會計界陳茂波（Paul）四個「潮州冷」外，仲有鄉議局主席劉皇發及副主席張學明、李鳳英、王國興、李國麟、李慧琼、劉江華、黃定光（象哥）同謝偉俊，大部分都攜眷出席。不過，阿Paul帶老婆去之餘，仲帶埋囝囝同外母去，好老公、好爸爸、好女婿，真係乜都畀佢做晒。
一行人先後走訪汕頭、潮州、揭陽及惠州大亞灣，各地市政府請宴款待唔少得，但除咗官式宴會，仲把握時間四出搜羅地道美食。話說首日官式晚宴後，金勞詹請大家到名震汕頭嘅「福合埕牛肉丸」歎牛丸、反沙芋及反沙番薯。健波話，牛丸又爽又香口，兼夾彈牙，好多人食後即時想起周星馳電影《食神》嘅瀨尿牛丸，彈牙到可以打乒乓波，搞到個個都要添食。
行程中，大家又品嘗到潮州灼爽口螺片及滷水獅頭鵝。獅頭鵝一隻十幾斤重，鵝頭、鵝頸、掌翼、鵝肝之中，以大大片嘅鵝肝最美味，入口即溶，但膽固醇勁高，好多議員食少少就收口。不過，健波好勇猛，成大片食晒落肚，難怪佢話自己搵命博，食一片就用晒一星期嘅膽固醇配額。健波仲大讚「爆炒薄殼」肉嫩鮮味，而「涼瓜瑤柱燉花膠湯」就鮮甜又夠特色。
大家歎盡潮汕美食外，每拜訪一個市政府就獲送贈當地名產，惠陽市政府送梅菜，汕頭市就送茶葉及橄欖菜，又食又拎好口福。講開又講，金勞詹早前捐咗幾千萬畀潮州，支持家鄉發展。今次一班潮籍議員回家鄉，睇到家鄉發展蓬勃都好欣慰同自豪。
卓妮