政情：阿富白鴿黨藕斷絲連
立法會議員鄭家富因就政改立場同黨有分歧而毅然退黨，事隔一個月、當大家以為一切已成定局之際，白鴿黨嘅大埔工作隊竟然寄出一份仍然有阿富張相嘅工作匯報畀當區居民。阿富唔通同白鴿黨欲斷難斷？
聽白鴿黨嘅大埔區議員區鎮樺講，原來呢批新嘅宣傳單張早喺六月時經已落咗「柯打」，仲印咗成幾萬張，故大家喺六月尾知道阿富決定退黨，都唔知點收科，仲諗緊應該用貼紙遮住阿富定個白鴿logo好。不過阿富就唔想嘥資源，話唔介意佢哋照派單張，但就講明希望佢哋快啲手喺七月底派晒佢，費事令市民誤會喎。
雖然白鴿黨已經把握機會盡快派晒啲單張，但聽講依家啲單張有如「五餅二魚」，派極都仲有幾千張，睇嚟要甩手都冇咁易噃。而「無黨一身輕」嘅阿富，嚟緊仍然會就一啲議題同白鴿黨合作，不過每次印宣傳品時都要再傾會唔會印黨logo同名，睇嚟佢同白鴿黨依然會繼續藕斷絲連落去！