政情：「潮人」設宴為饒宗頤賀壽
今日係「潮州之寶」國學大師饒宗頤九十五歲舊曆生日，潮州市委、市人民政府尋日喺上環嘅潮州會館搞慶壽宴向饒老祝壽，創會主席陳偉南、主席許學之、發展委員會主席莊學山、潮州商會副會長陳幼南、潮州商會常務會董高永文醫生都有出席。對饒老相當敬重嘅港大饒宗頤學術館館長李焯芬教授雖然唔係同鄉，不過都有嚟同歡。饒老兩位千金饒清綺、饒清芬、二女婿鄧偉雄都有出席，外孫女張圓瑛仲特登喺外國返嚟同公公賀壽添。饒老相當幽默，佢話自己個名嘅「頤」字代表面珠，叫大家嚟壽宴一定要大快朵頤。
自我按摩保健
講到健康之道，饒老話規律嘅生活對身體相當重要，佢每晚臨瞓前都會為自己按摩，搓搓手捽捽腳，最緊要記得郁動吓兩邊肩膀。雖然只係簡單嘅保健動作，不過對氣血運行好有幫助。難怪高醫生話尋日同饒老握手問好，畀饒老強而有力嘅手握到有啲痛。高醫生話佢當年因為要出席一個有唔少潮州人嘅慈善活動，為咗字正腔圓讀出各人名字，事先去咗請教饒老，因而結緣。
嚟緊八月八日，德高望重嘅饒老仲會去敦煌，出席由五百位來自世界各地嘅名人學者為佢搞嘅盛大露天生日會，之後仲會喺敦煌出席兩日學術論壇。