政情：4L4P一飯泯恩仇
從政猶如男女事，離離合合本平常。今年初，經濟動力同專業會議由「拍散拖」醞釀發展更親密關係，變成霎氣鬧翻，事隔四個月，兩個政團最近修好，早前仲擺咗一場和頭酒，經濟動力嘅「4L」同專業會議嘅「4P」八個人全部到齊，一飯泯恩仇。4L同4P再續前緣，走埋一齊，勢必忍唔住心思思「搞嘢」，以壯聲勢，最受影響嘅應該係同走工商專業路線嘅自由黨。
經濟動力同專業會議同屬建制派新興力量，理念相當接近，都係同政府關係友好，喺政府嘅「族譜」裏面肯定親過工聯會同自由黨，兩個政團各喺立法會手握四票，若能結盟，實力不容忽視。所以，今年初兩黨忽然「撻着」，愈行愈埋，可惜，消息曝光後，有人猜疑對方向傳媒放風，心雄想爭坐老大位置，於是雙方頓生芥蒂，陷入冷戰，一段剛萌芽嘅關係就咁被擠熄。
未來兩年有合作計劃
經濟動力同專業會議嘅地下情幻滅，雙方鬥氣嘅消息時有所聞，好似4L之一林健鋒（Jeffrey）競逐政改方案嘅小組委員會副主席，建制派三人倒戈，投票畀民主黨劉慧卿，雖然Jeffrey最終都當選，但亦惹起「內鬼」疑雲，其中兩名疑似倒戈者正係4P中嘅何鍾泰同劉秀成。之後，4L搞工商政改論壇，4P又全部玩失蹤。正當大家諗住兩個政團再無偈傾之際，4L同4P突然又修好，真係估佢哋唔到！
據聞，4L同4P早前已經擺咗場和頭酒，席間雙方都客客氣氣，表明過咗去嘅當粉筆字抹咗佢，無謂計較，以後合作偷快！即係話，4L同4P唔止冰釋前嫌，未來兩年更加會有新嘅合作計劃，聯手出擊造勢，到底有乜大計，大家不妨拭目以待。
4L同4P再續前緣，今次到底係三分鐘熱度，定係細水長流？留待時日驗證。不過，從政治現實角度，雙方冰釋前嫌，肯定各有算盤。4L兩年前退出自由黨，另組經濟動力，當然希望有所作為，目前部署進軍下年區議會選舉同後年立法會選舉，呢個時候，與同商界同專業界關係唔錯嘅4L再議結盟，就可以喺立法會內將主要對手自由黨邊緣化。至於4P，由於係新組合，自然亦想喺議會內多個朋友、少個敵人，有利保持影響力，於是造就兩黨又漸行漸近。