中環耳目：羅仲榮推介Cafe TOO星洲炒米
金山工業主席羅仲榮（Victor）平時公務繁忙，同太太撐枱腳嘅時間唔係咁多，一得閒佢就會陪太太到港島香格里拉酒店七樓咖啡廳（Cafe TOO）食嘢，其中太太鍾意食自助餐，佢就對呢度嘅星洲炒米讚不絕口。
Cafe TOO由酒店開幕營業至今已十九年，甚受城中名人歡迎。餐廳廚務部服務經理祥哥話畀卓妮聽，佢哋嘅自助餐同一般酒店比較，勝在選擇多樣化，目前有七大類中西美食任君選擇。為咗提供更多美食，餐廳現進行局部改裝，快將有全新面貌。
打米粉有秘訣
至於Victor推介嘅星洲炒米，係餐廳極受歡迎嘅單點菜式。祥哥話呢度嘅米粉夠晒爽口彈牙，秘訣係「打米粉」嘅程序。首先米粉放入冷水用猛火煲滾，然後熄火再浸一陣，取出米粉後自然吹乾。祥哥教路，咁樣處理過嘅米粉好乾身爽口，唔會黐埋。將打過嘅米粉伴以泰式蝦米乾、葱段、燈籠椒一齊炒，色香味俱全嘅星洲炒米即可上碟。
