中環出更：朱繼陶戴AP金錶啱手形
香港鐘錶業總會主席朱繼陶（Joseph）唔憂冇靚錶戴，事關佢係太子珠寶執行董事，屋企收藏嘅靚錶多不勝數。上周佢出席尖沙咀一個時計展，卓妮見佢戴上愛彼錶（Audemars Piguet）皇家橡樹系列嘅玫瑰金腕錶，價值廿幾萬元，Joseph大讚隻錶好夾佢手形。
話闊面利老花
隻AP錶直徑卅幾毫米，配以真皮錶帶，令Joseph自然流露出成熟嘅氣質。咪睇佢五年前先至喺打咗三十幾年工嘅恒生銀行退休，但傾起腕錶嘅潮流歷史，Joseph都講到頭頭是道，事關受到創辦太子珠寶嘅老婆大人朱鄧麗萍同埋舅仔太子珠寶主席鄧鉅明耳濡目染嘛！
佢話近年流行大大隻嘅腕錶，有啲甚至大到錶面直徑有成四十毫米咁闊，比起以前啲「斗零（五仙硬幣）」咁細嘅錶仔真係大好多。佢笑謂，對於有老花嘅人嚟講，咁大隻錶真係造福人群啦！