中環出更：啟人惹醉駕官司變得乖乖
立法會議員霍震霆三子、今年廿二歲嘅霍啟人早前涉嫌酒後駕駛撞車，仲賣晒報紙，爸爸霍震霆（Tim）及前港姐冠軍媽咪朱玲玲擔心之餘，仲尷尬不已。話口未完，啟人極速變乖，前日相約爸爸飲下午茶，佢今次滴酒不沾，改飲凍朱古力！
下月中要返警署報到嘅啟人，仍然留港放暑假，未知是否受官司影響，啟人顯得悶悶不樂，星期六更飛甩如糖黐豆嘅女友，改陪爸爸去中環歷山大廈COVA歎下午茶。
嗰陣係晏晝五點半，着住深灰色有帽衞衣、短褲及白色Nike波鞋嘅啟人，同穿着牛仔恤衫嘅爸爸打對面坐。兩仔爺似乎冇乜胃口，阿Tim柯打一杯消暑西瓜汁，啟人就叫咗杯凍朱古力，兩口子邊歎茶邊閒話家常，氣氛輕鬆，但啟人似乎有心事，不時托頭沉思，做爸爸嘅惟有笑瞇瞇開解佢，認真唔話得。
「阿媽冇唔准我揸車」
飲咗半粒鐘，阿Tim叫埋單，啟人見卓妮上前同佢兩父子打招呼，顯得錯愕，但仍面帶笑容。講起涉嫌醉駕單案件進展成點，佢尷尬地笑一笑，不願多談。咁媽咪有否大發雷霆？好有家教嘅啟人大方地回應話：「阿媽冇鬧，亦冇唔准我揸車。」
問阿Tim會否提醒兒子以後小心揸車，佢瞄了啟人一眼，報以一笑，好有默契，似乎對兒子仍然相當信任。Tim早前已公開講過，會叮囑啟人以後小心揸車，又話兒子已經一事長一智，幫口幫到出晒面。
離開COVA後，啟人陪爸爸行入太子大廈嘅美國時裝名牌Brooks Brothers逛咗一圈，但始終無收穫，惟有打道回府，急call司機，啟人同爸爸齊齊登上座駕走人。
卓妮