「人怕出名豬怕肥」，專業會議梁美芬做咗立法會議員後，個名多咗曝光，但遭不法之徒冒名作惡嘅煩惱亦隨之而來。唔講唔知，原來上年暑假，梁美芬曾經被冒名喺街上籌款，日前又有人以「Leung Mei Fun」（「梁美芬」英文寫法）名義，喺網上論壇發表「違規」言論，梁美芬見事態嚴重，報警備案，希望借助警力揪出假「梁美芬」。
梁美芬日前發現大學教育資助委員會網站下嘅「高等教育論壇」，有一條「Leung Mei Fun」寫嘅帖子被網站刪除，按網站規則，若留言涉及誹謗同粗口等元素，就會被刪除，即係「Leung Mei Fun」嘅留言內容，正當極都有限。梁美芬擔心，今次事件係一啲別有用心嘅人，冒用佢嘅名字四處作惡，破壞其個人聲譽，加上有被人冒名街頭募捐前科，梁美芬唔敢怠慢，尋日去旺角警署備案。