中環出更:田二少父女歐洲赤腳行街

假期去旅行,有人志在減壓,有人一心增廣見聞。人稱「田二少」嘅自由黨常委田北辰同家人旅行,原來想搵個最靚嘅時機傾心事。六月中,阿田三女Lavina喺美國哈佛大學商學院MBA(工商管理碩士)畢業,阿田請Lavina歐遊法國、西班牙同奧地利十日當慶祝時,順便傾吐從政辛酸事。

吐露從政感受

阿田話,最難忘係法國嘅清新空氣同潔淨街道,佢喺法國嗰幾日,每朝同Lavina唔着鞋喺酒店附近街道赤腳行街,感覺好自由。

阿田有三女一子,但甚少一家六口去旅行,通常拍住老婆或者其中一個仔女出發,話咁至傾到心事喎。阿田今次亦唔例外,沿途同Lavina吐露從政感受,話從政路唔易行,香港社會反商情緒嚴重等等。Lavina輔導阿田,叫佢擴大政治光譜,搶佔高層管理人員同專業人士票源。阿田笑言,Lavina已獲企業顧問大行McKinsey聘用,九月返工,今次歐遊,得到McKinsey員工嘅專業意見,請客都請得特別開心。

為應屆會考生打打氣,請瀏覽on.cc 東方互動《放榜無限分2010》專輯