中環出更：龔仁心夫婦米埔郊遊樂
香港郊野環境近年不斷遭到破壞，好彩仲有個米埔自然保護區。上星期米埔舉行一年一度嘅基圍蝦收成聚會，搵咗新田鄉事委員會主席文富穩聯絡各界友好出席，包括有華懋集團執行董事龔仁心夫婦、時裝設計師鄧達智（William）、信和集團總經理余漢坤夫婦、鄉議局當然執委香灼璣等。大家遊覽米埔大自然之餘，仲齊齊勁擦新鮮基圍蝦。
龔仁心夫婦係首次出席米埔收成聚會，仲帶咗個小朋友去見識吓。佢哋兩公婆為今次郊遊做足準備，大家着住Nike情侶裝波鞋，出發前又噴定蚊怕水，並獲好友送贈竹蔗水清熱消暑。龔仁心對大自然好有興趣，沿路參觀過淡水池塘、魚塘、紅樹林、蘆葦叢、蓮花塘同鷺鳥等，又研究青蛙產卵同細心觀察蓮葉上嘅蜻蜓脫殼過程，不時即場用手機拍攝做紀錄。
至於William就被蓮塘上嘅睡蓮迷倒，揸住部Canon數碼相機係咁影。佢話去外地旅行都帶住呢部相機，因為夠晒輕便，唔使孭住個大相機袋，減低扒手嘅注意。
觀賞捕捉基圍蝦
當日嘅戲肉係傍晚潮退時捕捉基圍蝦。每年四月至十一月都係基圍蝦收成期，米埔人員會喺水閘口設置漁網，然後打開水閘畀基圍內嘅塘水湧入海灣，啲蝦就會隨水流進入漁網。當晚嘅收成相當唔錯，烚咗五大盆基圍蝦，仲有文富穩提供嘅枝竹炆花腩、老火陳皮鴨湯、炆豬手及豬腳、黃酒雞、銀杏豬肚，以至好醒胃嘅子薑菠蘿等，食到個個舔舔脷！不過，龔仁心夫婦同個細路就有要事早走，無緣享受呢餐咁正嘅基圍蝦美食！
卓妮