政情：政黨夾計避開社民連
立法會將於明年底遷入新大樓，其中有四層寫字樓預咗畀六十名議員做辦事處，即係十五名議員一層。我哋早前寫過各黨派就將來拍住乜嘢人做鄰居，夾到頭都大埋。事隔幾日，事件火速取得突破性發展，大部分政團都已夾夠十幾人坐埋一齊。何解？咪就係想避開社民連三子囉！
社民連喺議事堂內掟蕉掃枱，會外亦粗口爛舌，好多建制派同溫和民主派都怕咗佢哋，唔想同佢哋做鄰居朝見口晚見面。最新消息指出，民建聯已同工聯會四子及勞聯李鳳英，啱啱砌夠十五人獨佔一層，民主黨亦搵咗七名「散件」溫和泛民另霸一層，肯定唔使與社民連為鄰。
睇見呢個情況，其他建制派政團開始有危機意識，加速進行「收購合併」。其中五散人、公民黨、自由黨同匯賢智庫葉劉淑儀，近日已達成共識一齊做鄰居，再搵多一位議員就湊夠十五人。剩低嘅經濟動力、專業會議、詹Sir二人組同另外幾位「散件」建制派議員，據聞亦已夾夠十三人，即係得番兩個空位剩。換言之社民連三子嘅辦事處一係就要分開設喺唔同層數，一係就由經濟動力嗰組人硬啃，最後隨時又會演變成政治風波。