政情：三代航天員難得聚首
神舟五、六、七號三代六名航天員楊利偉、費俊龍、聶海勝、翟志剛、劉伯明同景海鵬，近日應中華總商會邀請一同訪港，尋日到尖沙咀科學館同三百名本港中學生真情對話，分享佢哋嘅航天心得。其中多次訪港嘅「老大哥」楊利偉表示，佢哋幾位航天員經常要喺國內不同地方受訓，甚少見面，其中幾次難得聚首一堂都係喺香港，所以佢要特別多謝包括中總在內嘅香港團體多次邀請佢哋來港，令佢哋幾位兄弟有多啲機會見面傾偈。
一眾同學仔面對六位神舟英雄都顯得非常雀躍，紛紛把握機會發問，最有興趣嘅係佢哋喺太空生活嘅起居飲食，又詢問費俊龍有冇兌現承諾，喺太空返回地球後同囝囝一齊去釣魚，費俊龍話梗係有喇。
為咗提高本港學生對國家航天事業嘅興趣同認識，中總最近捐出一百萬元，資助三十位中學生下個月到北京同西昌參加太空體驗營，等佢哋親身體驗吓中國航天員訓練過程，楊利偉嘅老師、北京航太專家孫錦雲教授都會參與其中。
有之前參加有關體驗營嘅本港學生透露，咁多項太空訓練之中，以「三百六十度轉椅」最辛苦最嚇人。今次負責帶隊嘅太空館館長陳己雄憶述，去年畀人推佢出去身先士卒，結果就搞到佢辛苦咗成日，下次都係咪搞喎！