政情：曾智明張俊勇跟名師學舞龍
香港中華總商會前晚舉行晚宴歡度一百一十歲生日，中總青年委員會一眾委員席間表演舞「花式龍」助興。負責舞龍頭嘅青委會主席曾智明（Ricky）與舞龍身嘅常委張俊勇（Thomas），跟隨常委陳光明手上嘅龍珠舞動，歷時五至六分鐘。演出令台下嘉賓睇得好肉緊，期間更傳出：「千祈咪失手呀，飛埋嚟就大件事喇！」但最終都順利完成，全場拍爛手掌。
Ricky、Thomas、陳光明等一班青委之所以舞得有板有眼，原來係早喺一個月前，跟隨夏國璋師傅個孫學咗四堂。據講第一堂係喺油麻地眾坊街一個空地練習，但由於無配套設施，所以Ricky就借出九龍塘大宅個花園，畀大家練埋餘下三堂。Ricky形容，舞龍最難係全隊人嘅合拍性，因為舞龍過程中要玩花式，好易亂龍，好彩最終不負眾望，成功演出。
陳光明食過「夜粥」
Thomas就難忘練習過程，話當初喺油麻地當街當巷練習感到好尷尬，其後移師到Ricky屋企練習就好好多，大家都夾得好好。當晚Thomas弟弟張俊挺到場為哥哥打氣，兩兄弟感情相當好。據講負責舞龍珠嘅陳光明食過「夜粥」，幾十年前曾跟過夏國璋師傅學過醒獅，難怪當晚舞龍珠舞得咁流暢啦！