政情：議員濫用電子剪報嘥公帑
資訊有價！立法會秘書處最近向議員出通告，叮囑各位尊貴嘅議員唔好濫用電子剪報服務，事關根據秘書處統計，過去一年議員嘅電子剪報使用量每個月都爆晒燈，其中有六人堪稱「新聞搜尋狂人」，每月點擊電子剪報超過五千次，用量非常驚人。秘書處擔心剪報系統使用量超標，下次續約時會被懲罰性加價。如果擔憂成真，納稅人啲公帑就真係使得冤枉囉！
立法會為方便議員、議員助理同秘書處職員上網查閱新聞資料，自九八年起購買電子剪報服務。呢項服務一啲都唔平，立法會現時每年要花費約一百萬元，而且係限量使用，每月點擊上限為九萬八千八百次，以六十個議員佔用去九成五用量計算，平均每名議員每月最多只應點擊一千五百幾次。
疑有人外洩帳戶密碼
秘書處最近就議員使用電子剪報嘅情況進行統計，範圍由去年五月到今年六月，一睇嚇親人，個個月都超出上限，最誇張嗰兩個月，總用量竟然超標接近一倍。雖則唔係用自己袋裏面嘅錢啫，都唔使去到咁盡㗎！
不過公平啲講，並非每位議員都咁唔自律嘅。秘書處由今年五月起實施新措施，每位議員改以獨立帳戶進入剪報系統，邊個「大使」，邊個「慳家」，一目了然。秘書處通告不點名指出，其實有超過一半議員都係低用量客戶，每月點擊量唔超過一千次，但係有六名議員好唔自律，竟然喺過去兩個月都分別點擊超過五千次，即係超過一千五百次基準嘅三倍，大幅拉高整體點擊次數，唔爆燈超標至出奇啦。
秘書處表明，電子剪報嘅高使用量已引起關注，擔心來年同服務供應商商討續約時，會畀人大幅加價，呼籲議員節約，仲會定期為議員同佢哋啲助理舉辦工作坊，教導佢哋點樣可以更有經濟效益咁使用電子剪報服務，以免浪費公帑，方法包括唔好每次睇新聞都要打印出嚟，既環保又可以減少點擊量。
據聞個別議員帳戶點擊量超標，其中一個原因係有人將帳戶密碼外洩，令某啲本來唔應該享受到立法會呢項服務嘅人，可以免費上網查閱新聞。秘書處除咗盡快更正啲議員嘅使用方法，亦應該立即嚴打呢類濫用公帑嘅行為。