中環出更：蔡太珊瑚胸針一見鍾情
中華總商會會長蔡冠深太太蔡關穎琴（Janice）品味非凡，除咗精於收藏字畫外，連對女人扮靚必備嘅珠寶鑽石，都有獨特審美觀。日前卓妮喺酒會上見佢戴咗個好罕見嘅珊瑚胸針，上邊襯咗兩粒大大粒南洋珠，顯得佢好高貴大方。
寶石配襯 矜貴趣致
Janice話，佢一向好鍾意未經雕琢、形態天然嘅珊瑚珠寶，有次應一位奧地利珠寶商邀請，入場參觀佢哋喺香港珠寶展嘅攤位。佢一見到呢個色澤紅潤嘅珊瑚胸針就愛不釋手，桃紅色珊瑚喺五、六個小巧鵝黃色精石鑲嵌配襯下，顯得矜貴趣致，再加上一粒圓形同埋一粒淚滴形南洋珠，成個設計線條同埋顏色豐富，同一般珠寶鑽石給人嘅感覺好唔同。
咁特別嘅配飾只賣幾萬港元，Janice初時以為老細講緊歐元或美金，當堂覺得好平、好抵，但又唔敢講出聲，費事畀老細坐地起價！
珊瑚其實係深海動物，係唯一有生命嘅珠寶。一粒結構紮實、色澤均勻嘅深紅色珊瑚，價值唔輸鑽石架！但Janice話，媽咪都有留低一粒粒嘅珍貴珊瑚畀佢，但佢唔計較顏色，形態美最重要！