中環出更：拓內地鐘錶市場 高鼎國戒急
創業難，守業更難，作為承先啟後嘅商界二、三代，面對上一代打拚得來嘅龐大生意王國，壓力實在唔小。好似由阿公開始已喺中國代理瑞士品牌「英納格」（Enicar）名錶嘅高鼎國，雖然接手五年間業績翻十倍，每年零售額達十億，但面對住各國鐘錶名牌都開拓中國市場分一杯羹，一方面要喺未來五年將市場佔有率由百分之五增加至百分之十，另一方面亦要避免發展過急，一次過增設太多分銷點，要取得平衡認真唔容易。
每十個中國人就有一隻
「又襟又準又夠格，戴錶請戴英納格」呢個廣告口號街知巷聞，作為第三代代理嘅英納格大中華區總裁高鼎國，從來無喺下屬面前擺老闆款，反而事事親力親為，令佢喺五年內令品牌銷售額勁升十倍。今時今日，英納格喺全國銷售點有千幾個，差不多每十個中國人就有一隻英納格，所以佢哋嘅銷售策略係以人口比例為依歸，換言之，人口愈多嘅省市，亦係生意最好嘅網點。
英納格銷售有咁好成績，三十出頭嘅高鼎國並無自滿，反而謙卑歸功於公公李惠利及爸爸高叔平打落嘅江山。不過，高鼎國坦言，英納格銷售額近五年急速上升，好大程度係受惠於中國經濟起飛，但佢明瞭經濟無可能永遠向好，加上兩年前遇上金融海嘯嘅經驗，現已學懂減慢發展步伐，為可能出現嘅經濟放緩提供緩衝，壓一壓今年已增長達四至五成嘅營業額。
貴為香港鐘表業總會副主席嘅高鼎國，除咗專注生意外，亦希望反思鐘錶對人嘅意義，不但要為客人提供一隻準時嘅手錶，同時希望好似公公同爸爸咁做多啲慈善工作回饋社會。所以佢積極參與香港青年聯會常務會董嘅工作，早前更捐出一百萬元予滬港青交流促進會，同青聯合辦全國青少年世博體驗團，佢自己亦有身體力行隨團，同成班年輕人打成一片，玩得好開心。
卓妮