政情：李少光外訪宣揚禁毒
本港青少年濫藥成風，港府除咗推出校園自願驗毒計劃外，就只有加強打擊毒品來源，難怪保安局局長李少光呢幾日訪問馬來西亞及印尼，個心都掛住打擊俗稱「Ｋ仔」嘅氯胺酮。光哥尋日拜會馬來西亞皇家關稅局總監拿督斯里依布拉欣，雙方除咗討論海關各工作範疇外，光哥特別提到印度未將「Ｋ仔」列為危險藥物，促請各國繼續努力打擊毒品。
光哥又到訪吉隆坡國際機場，參觀入境及海關前線人員點樣管理檢查站，包括檢驗偽證。原來當地發現嘅偽證仿真度極高，光哥要即場戴上老花眼鏡先至睇得清楚。光哥話，鑑於人流和貨運量急劇增加，全球已成為一個世界村，香港同馬來西亞已做好準備，喺未來加強合作、促進效率。光哥傍晚已轉飛印尼繼續訪問，明日結束行程返港。