政情：劉應東做騷畀人甩底？
匯賢智庫立法會議員葉劉淑儀近日馬不停蹄，為徒弟劉應東參加南區區議會薄扶林區補選造勢宣傳，早前仲拉埋海洋公園主席盛智文同港鐵行政總裁周松崗落水，增加愛徒嘅曝光機會。佢尋日又帶同劉應東與港鐵西港島線工程嘅主管工程人員開會，商討能否將工程卸泥口移離薄扶林區，事前發出嘅採訪通知，寫明兩名立法會議員建築界嘅劉秀成、以及本身住喺港島西沿線嘅保險界陳健波都會到場。
不過記者到場之後，只見到葉劉同佢愛徒，唔見劉秀成及陳健波。劉應東開頭話根本冇講兩人會到場，其後記者翻查採訪通知為證，佢就改口話劉秀成係臨時有事嚟唔到，陳健波就從來都冇話會出席，至於點解採訪通知會咁寫，佢都唔係好了解喎。
雖然今次搵議員撐場臨門撻Ｑ，但劉應東並冇氣餒，聽日會再聯同一班薄扶林區居民，到中環美利大廈向運輸及房屋局遞交請願信，反對港鐵將卸泥口設喺鋼線灣，然後遊行到政府總部抗議。唔知到時又會唔會有啲星級名人撐場呢？