政情：戴德豐轉會址賺千萬
港區省級政協委員聯誼會去年無懼樓價高企，斥資四千幾萬元，喺灣仔海外信託銀行大廈購入一整層寫字樓做新會址，尋日舉行入伙儀式。主席戴德豐透露，會址喺一年間已經升值到五千幾萬元，「唔覺意」幫聯誼會帳面勁賺一千萬元。
成立四年嘅省政協聯誼會，成員一千七百人，成立初期喺灣仔華潤大廈租單位做聯絡點，去年再火速籌得五千萬元自置物業。睇番新會址門口嘅捐款芳名錄，前全國政協常委張永珍捐咗一千萬元，信和置業主席黃志祥捐五百萬元，「霍老」霍英東兒子霍震宇捐一百二十萬元，新世界發展董事總經理鄭家純、全國政協常委洪祖杭同前全國人大常委曾憲梓兒子曾智明等各捐一百萬元。有咁多「大孖沙」支持，唔怪得聯誼會籌錢咁有效率啦。
新會址佔地七千呎，裝修實而不華。講到單位帳面升值千萬元，戴德豐話：「升幾多都無用吖，我哋都唔會賣嘅。」