大浪西灣工程風波近日愈鬧愈大，引發數以萬計網民同保育人士，以各種不同方式反對抗議，但負責嘅環境局同發展局，拖到尋日先至正式宣布將該處納入發展審批地區圖加以規管。立法會一個委員會尋日討論今次風波時，多名議員指全港仲有好多珍貴保育地未受規管，其中自由黨主席劉健儀就用「扑傻瓜」嚟妙論港府嘅同類事件手法，見一單先扑一單，冇做到任何嘢防患於未然或作出全面規管。
