政情：新大樓徵藝術品議員懶理
立法會為明年底落成嘅新大樓公開徵求藝術品，經過首輪評審選出十二個入圍提案，尋日率先喺現有立法會大樓內展出設計草圖，供未來「用家」議員畀意見，市民今日起亦可到場參觀。不過唔知係咪因為立法會已經休咗會，定係班議員對自己嘅未來新居冇乜興趣同意見，尋日整個展覽拍晒烏蠅，等咗成日都只得民主黨副主席劉慧卿一個嚟睇。
卿姐唔信兩會共融
卿姐尋日睇咗一輪之後，話藝術呢家嘢，真係各花入各眼，點問佢都唔肯透露心水選擇，唔知其實係咪冇一份睇得上眼呢？當佢行過一個名為「圓滿」、象徵「行政立法互相合作」嘅作品時，仲忍唔住大潑冷水，話：「邊有可能吖！」
睇番今次入圍嘅作品真係都幾有創意，例如其中一個指住天空嘅小孩塑像，寓意社會「天天向上」，小人物都可以發揮政治影響力。另一個名為「演講亭」嘅作品，就容許市民入去拍攝錄像，然後喺新大樓對出廣場公開播放。須知新大樓就喺正新政府總部側邊，如果呢個設計最後獲選，將來肯定會成為示威者反對同揶揄政府嘅新武器。
