中環耳目：林炳昌宴客慶祝討回清白
因接辦先科案無端惹上官非嘅「廉署剋星」林炳昌（Andrew），早前上訴得直討回清白及恢復執業律師資格後，身邊好友排住隊同佢慶祝。卓妮八到Andrew本周一喺灣仔合和中心六樓嘅「醉紅樓潮州酒家」筵開兩席，請咗多位商界大孖沙及政界好友出席，齊齊歎潮州菜慶祝。
當晚獲邀出席嘅大孖沙有英皇集團主席楊受成、渝太地產主席張松橋、創興銀行董事總經理兼行政總裁廖烈智、金源米業主席林烱偉、中南證券老闆莊有堅、立法會議員詹培忠及中策集團副主席柯清輝等，總共有二十人出席。原本中策集團非執行主席馬時亨都喺獲邀之列，但佢有要事去咗美國未能出席。
由於Andrew邀請嘅大部分好友都係潮州人「家己冷」，所以特意挑選咗一間潮州酒家開餐。一班好友咁捧場，Andrew特意點咗「醉紅樓」多味潮州招牌菜，部分仲係菜牌無寫嘅，包括潮州翅、螺片、凍蟹、潮州炸雙棗（蝦丸及肉丸）、潮州四喜拼盤等，據講每席盛惠一萬五千元，絕對出得大場面！