中環出更：扮嘢文潮用iPad睇《東方》
iPad上個禮拜喺香港開售，隨即賣到斷晒市。潮流觸覺快人一步嘅盛智文，原來早於四月iPad喺美國發售時，已經第一時間託人喺當地入貨，仲一次過掃咗四部，除咗自己之外，太太同仔女都一人一部，真係識做！
用Google翻譯
扮嘢文大讚iPad易用又方便攜帶，足以取代傳統電腦，帶住佢公幹就啱晒。為咗喺外國都可以睇到香港最新消息，佢將《東方日報》網頁存入電腦書籤，無論喺香港定外地，《東方》都係佢必睇網頁之一！為咗明白報道內容，佢仲教卓妮利用Google嘅翻譯功能，將本報嘅報道即時翻譯成英文，咁樣睇新聞無難度嘞。
雖然扮嘢文係iPad同iPhone嘅支持者，但作為一個精明消費者，佢唔會樣樣都盲目跟潮流。好似iPhone 4人人追捧，但佢就未打算入貨，事關iPhone 4推出後被指接收有問題，扮嘢文都有留意事態發展，佢同卓妮講，除非生產商向消費者交代更多資料，否則佢都係繼續用住部iPhone 3Gs先！