中環出更：中總慶110歲太空人賀壽
中華總商會尋日搞大派對歡度一百一十歲生日，由朝到晚喺會展舉辦連串活動。雖然尋日黃、紅、黑雨掛齊晒，但都冇阻各界名人撐中總嘅熱情。白天有管理近萬億元人民幣資金嘅社保基金理事長戴相龍撐場，夜晚會慶晚宴更加掀起慶祝活動嘅高潮，出席嘉賓星光熠熠，包括專程來港嘅楊利偉等六位中國神舟太空人、前中總會長曾憲梓及霍震寰一家、副會長褲王楊釗、小提琴家姚珏及一對愛女等城中名人，當然唔少得會長蔡冠深太太蔡關穎琴。
戴相龍專程來港撐場
尋日朝早中總先喺會展舉辦首屆香港高峰論壇，請咗好多內地重量級財經界人物來港，其中以戴相龍最受矚目，事關金融市場對社保基金嘅投資動向好敏感嘛！做過天津市長嘅戴相龍專程來撐場。蔡會長自爆同戴係多年好友，佢嘅新華集團廿幾年前已經喺天津投資，七、八年前戴做天津市長時，蔡會長又加碼投資房地產，難怪兩人咁老友。戴相龍有四年未踏足香港，尋日喺午餐會演講後，就搭下午四點幾飛機返京，喺香港逗留唔夠廿四小時。
至於晚宴嘅焦點，就集中喺楊利偉、費俊龍、聶海勝等六個太空人身上。楊利偉同卓妮講，今趟專程來港出席中總活動，佢哋會留喺香港幾日至走。中總好有心思送咗每位太空人着太空裝嘅相畀佢哋作紀念品，連太空人都撐場，中總嘅江湖地位唔使多講啦！
霍震寰嘅囝囝啟文、啟中同埋老婆陳琪琪，尋晚難得攜手現身，囡囡思緯就無出現。霍生話呢兩個月好忙，遲啲會去內蒙古，跟住同培華基金會出訪，所以暑假冇時間一家去旅行，佢希望九月抽空帶仔女去上海睇世博。卓妮喺午餐會都見到啱啱卸任嘅前中大校長劉遵義，佢同細佢廿二歲嘅太太麥嘉軒婚後難得結伴出席公開活動，佢笑謂唔返學校之後嘅生活好開心。蔡會長由朝忙到晚，蔡夫人亦都唔話得，由朝到晚都現身幫手招呼賓客，夫唱婦隨羨煞旁人。
卓妮