政情：社民連死咬白鴿黨
政改一役令民主黨被泛民群起攻之，但最新調查顯示，民主黨主席何俊仁及副主席劉慧卿嘅支持度喺政改通過後卻明顯急升。可能社民連都睇到這一點，更深明「時間會沖淡一切」嘅道理，知道去到二○一二年之時，選民分分鐘會忘記民主黨今日所做嘅一切，所以度咗條「陰招」，決定不停喺議會內外咬住民主黨唔放。不過劉慧卿不以為然話：「我乜都未驚過！」
社民連創黨主席黃毓民尋日同傳媒聚會，佢話政改一役民主黨轉軚支持政改，又搞暗室政治，充分凸顯該黨陰暗面，但時間可能會沖淡一切，依家唾棄民主黨嘅選民兩年後可能會唔記得呢啲「往事」，所以社民連嚟緊會繼續把握機會，喺議會內外挖該黨嘅瘡疤，等市民唔會忘記。
睇番上星期嘅政制事務委員會，社民連的確不斷咬住民主黨唔放，毓民寸爆支持方案嘅民主黨冇資格同大家討論方案細節。尋日問起社民連會繼續咬住民主黨唔放，卿姐就話，各人都有言論自由，社民連鍾意做乜就做乜；又話自己做咗議員咁多年，乜都未驚過！