中環耳目：施榮忻獨家福建菜宴手足
集富豪二、三代精英嘅百仁基金上月初已順利舉行換屆儀式，由菁英會創會主席施榮忻（Jaime）接棒出任主席。至於菁英會換屆就職典禮亦將於八月六日喺金鐘港麗酒店舉行，屆時「燕之家」創辦人白富鴻會正式由創會主席Jaime手中取過帥印，並邀得中聯辦副主任王志民到場主禮見證。
媽咪煎馬友炆鱔煲
Jaime早前就邀請新主席白富鴻同副主席洪為民品嘗福建家鄉菜，預祝順利交接。Jaime貴為福建幫頭領、全國政協委員施子清之子，以福建家鄉菜宴客唔出奇，但當晚安排嘅家鄉菜最特別係由Jaime媽咪親自下廚，不辭勞苦為乖仔炮製兩味拿手菜式，包括豆豉煎馬友及炆大鱔煲，簡直係溫暖牌家鄉菜。Jaime話，呢兩味菜由細食到大，媽咪嘅愛心同獨有嘅口味，外邊食肆肯定食唔到，所以佢班兄弟真係有口福。
呢個福建家鄉菜聚會喺Jaime位於灣仔嘅「老佛爺」酒窖內舉行，Jaime媽兩味拿手菜加上幾味到會，就變成一餐家常便飯，當然唔少得開番幾支葡萄酒飲番杯開心吓啦！
