中環出更：周達明逛完商場要坐車返Office
中環花園道美利大廈與太子大廈之間段路程話遠唔遠，話近又唔近，但相信行十分鐘就到，沿路仲有樹蔭唔使驚曬親。不過，呢段路程對於發展局常秘周達明（Thomas）嚟講，可能好遠都未定，事關卓妮有日午飯時間就見佢喺太子大廈行商場閒逛，之後坐番部AM102座駕返回美利大廈辦公室。
近排天氣又熱又焗，有日下晝一點零五分，卓妮行經太子大廈商場時，竟然見到着住恤衫西褲嘅Thomas，一支公漫無目的喺商場入邊閒逛商店，期間入過二樓Oliver's超市睇食品，同啲白領逼咗一陣，好快又行番出嚟，不過手fing fing乜都無買到。之後Thomas繼續沿住商場向前，左望右望window shopping，行到同樣喺二樓嘅PAPYRUS精品店門外，仲彎低腰睇咗櫥窗一陣，最後都係空手而回，無收穫。
卓妮上前同佢招呼，問Thomas做乜咁寫意行商場。佢話當日無工作午膳，原本諗住喺附近快餐店買飯盒，但咁啱又唔肚餓喎，於是咪出嚟散步鬆吓對腳囉！大家傾咗幾句後，Thomas就無再繼續逛街，行返落遮打道個出口，當時佢部AM102政府輝騰座駕已經喺路邊守候，司機於是開車門畀佢上車，然後返回美利大廈辦公室。
路程短坐車唔環保
Thomas明明話想出嚟散步鬆吓對腳喎，點解行十分鐘商場就走呢？潮流興行路健體，官場中人有啲都崇尚日行萬步，太子大廈同美利大廈之間嘅路程咁短，Thomas都寧願坐車，似乎唔多環保噃。
卓妮