勒索案被告爆女警大鑊

報稱無業的卅四歲被告黃樂民，否認盜竊及勒索共兩項罪名，惟昨日被裁定控罪表證成立。自今年六月十三日案發當日被收押至今的被告，昨出庭自辯時表現忿忿不平及激動，甫作供時便說「我忍咗四十幾日！」

被告供稱，他當晚七時由屯順街橫過屯匯街之際，一輛坐有四人的私家車駛至撞向他左身，他發現本案女事主黃淑君為司機，其同袍男友則坐在旁邊，他形容當時「兩個人臉紅紅飲咗酒，後面兩個唔知不省人事定瞓着」。

被告指稱，當時該車「衝擊力好大，撞到我左胸對下位置，我跌咗落地下，依家我都隱隱作痛」，該車曾一度停下及打開車門，惟未幾便高速逃走，現場則遺下一個手袋，被告拾起手袋步往附近行人路便「暈低咗，攤咗喺地下」，他數分鐘後醒轉過來，決定到警署報案。

之後，事主致電他說：「我係頭先撞倒你嗰個人，撞親你唔好意思，你都知我哋咩身份㗎啦，可唔可以和解，唔想冇咗份工……」又問被告要甚麼賠償。事主稍後再致電與被告傾談賠償金額，被告昨日不諱言：「我知（傷勢）幾嚴重，可能會跛咗死咗，養個ＢＢ都要四百萬，咪攞卅萬囉！死咗啲錢畀我阿媽用。」他指事主當時答應該筆賠款，又約他在附近的便利店外交收款項。

警署內要求驗傷無人理

被告直言，因自己險些撞死而「㷫到爆炸」，故事主的男友其後再來電時，他向對方說「搞大咗係報紙頭版，差人撞倒人走咗去，唔止係頭版，直頭係國際醜聞」；他在庭上慨嘆：「掉番轉小市民撞差人會畀人告蓄意謀殺！」他當時為讓對方識別身份，便掛上事主放於袋內的警察委任證，未料四名警員到場即將他推上警車及圍毆他。

被告被帶返警署後，懇求就交通意外的傷勢入院治療，但「居然可以冇人睬我」，直至稍後他暈倒地上，始被送入院。被告昨作供完畢，由於辯方表明會傳召醫院醫生講述被告之傷勢，案件押後至八月五日續審。

案件編號：TMCC 1987/2010