政情：蔡堅高票重掌醫學會
代表全港八千名醫生嘅香港醫學會尋晚舉行周年大會，選出新一屆會長，喺○四至○八年做過會長嘅蔡堅成功重返醫學會，以一千三百八十票高票再一次當選會長，大比數撼贏另一對手、僅攞到五百八十票嘅西醫工會會長楊超發，蔡醫生成個競選隊伍亦成功爭贏副會長、會董嘅職位。
今次競爭戰況非常激烈，兩位醫生資歷都好深，一直致力為醫學界謀福利，為打呢場選舉戰，雙方最近四出向業界洗樓拉票，宣傳政綱。蔡堅尋晚勝出後話，新任期內首要任務係培育新人，訓練多啲左右手，解決醫學會內部青黃不接嘅問題，此外要與當局處理醫療界嘅大議題，好似公私營合作、醫療融資政策等，積極收集業界意見。
已成為前會長嘅謝鴻興醫生，今次唔角逐連任，但就做咗老友蔡堅嘅提名人。謝鴻興醫生尋晚成功交棒後卻向大家訴苦，話過去兩年做會長嘅工作好辛苦，依家終於可以將膊頭上呢個重任交番畀蔡堅，即係一身鬆晒咁解。