政情：CY借人把口為己平反
行政會議召集人梁振英（CY）經常被指係當年「八萬五」政策嘅罪魁禍首，即使多次公開澄清都似乎洗唔到底。前晚佢同傳媒聚會時，特別推介一本由新鴻基地產創辦人郭得勝前助理潘慧嫻撰寫、取名《地產霸權》嘅書，話本書寫得唔錯，之後仲將自己啱啱睇完嗰本攞出嚟畀大家傳閱。
其實呢本書嘅大部分內容早已曝過光，最有趣反而係CY喺佢睇過嗰本書特別間低咗嘅幾段內容，其中兩、三段都係話「八萬五」並非當年推冧樓市嘅元兇，似乎係想借人本書幫自己平反。
CY又引述前高官何永謙嘅文章，暗批政府自退出房屋市場後，冇做到任何有關房屋政策嘅研究；又話早前咁啱睇到一個有關當年新聞嘅電視節目，話三十幾年前中環怡和大廈地王拍賣時，有近二十個地產商競投，依家就只剩番六、七個地產商有能力競投呢類地王，似乎喺度暗示香港地產市場競爭細咗好多，總之又係借人哋把口鬧人喇。