政情：林鄭空談 天下無敵
香港青年協會同港大攜手主辦嘅暑期青年領袖學校尋日舉行開幕禮，請嚟發展局局長林鄭月娥講talk，談如何做個好領袖。林鄭話做一個領袖同做上司一樣，應該鼓勵下屬努力做嘢，對下屬唔可以威嚇，應該了解佢哋嘅難處，唔係交咗難題畀下屬就算，要提供解決方法畀佢哋，否則若搞到下屬唔敢同上司講佢嘅困難，咁就唔係好領袖嘞！
佢仲提及當年佢係最年輕嘅社署署長，面對通縮要削減綜援，雖然畀好多人批評，但佢認為做得啱，亦相信以後冇人敢咁做。林鄭仲話，做領袖一定要有執行能力，要做嘅政策就一定要做，唔可以因為政治因素或者其他原因，乜都唔做；做領袖亦唔可以鐵石心腸，所以無論幾忙，每星期佢都抽三個鐘頭睇各界來信，有啲信仲令佢好感動。
林鄭向被外界視為「好打得」局長，喺官場亦以硬朗見稱，被稱為「下屬殺手」，更盛傳有下屬與佢不咬弦而過檔其他政策局，所以佢講到對下屬咁體貼，唔知做過佢下屬嘅係咪苟同。仲有佢提及削減綜援件事，講到前無古人，後無來者，但又唔見佢提近期塌樹、骨灰龕搞到一鑊泡。